Seuri Leutik: Kumpulan Lulucon

Dina basa Sunda apan rea pisan kecap anu ngagambarkeun anu seuri: nyeuleukeuteuk, ceuceuleukeuteukan, nyakakak, nyikikik, ngahaha, ngabarakatak, seuri leutik, imut, imut kanjut, keom, jeung lian-lianna. Imut, imut kanjut jeung keom mah tacan jadi seuri, kakara bibit kana seuri. Tapi sakapeung leuwih leleb leuwih anteb manan nu ngabarakatak. Lulucon anu dikumpulkeun dina ieu buku anu dijudulan "Seuri Leutik", lamun dianggap lucu, nu maca henteu kudu ngan ukur seuri leutik. Nyanggakeun naha rek ngabarakatak, nyikikik, nyakakak, nyeuleukeuteuk, keom, imut kanjut atawa lianna. Palebah seuri mah demokratis, urang wenang milih anu luyu jeung kahayang urang. Tur henteu kudu seuri ari henteu dianggap lucu mah, sanajan ulah jamedud. Bisi kembu pipi.